مليحه عزيزپور
تبریز
1
گل تانريني
ياري بؤلک
ايستي بير اَل
چؤره یي تک
بير پارچاسي
سنده قالسين
پارچاسيندا،
اؤکسوز اوشاقلارا وئره ک.
گل دونياني
ايکي بؤلک
حاقلي دده
ماليميز تک
گؤزلليکلر
سنين اولسون
پيسليکلري،
پاخيللارا پاي گؤنده رک.
سئوگيني گل
بؤلوشدورک
بير قيرميزي
آلما کيمي
گوله- گوله
بير ديش سن وور
بير ديش ده
من.
يوخ...يوخ...
سني
بؤلنمرم
تانري ايله
ده...
دونيا ايله ده...
سئوگي ايله
ده...
سنينله
ده...
" سن
"
بوتؤولوک له
منيمکي سن
بير تک
منيم...
2
دلي
گونلريمدي سئوگيلي!
نه سيقارا
يارار منه نده چاخير
گؤر حسرتين
وارليغيمي نئجه ياخير!
شنليیيم
کوفله نيب سئوگي!
او يالانچيق
گولوشومده چورويوب
گؤزلريمي غم
دوماني بورويوب!
هايدي بير
آزجيقدا سن سئو!
من سئوگينه
ياساقلانديم
اولمازلارا
توتساقلانديم.
هايدي
...
يوخسا اؤله
جه یم.
3
ائولرينه
چکيلن يول
قيل
کؤرپوسونه بنزه يير
سوچ ايشله
ميش بيريسينه!
آمان...
آچيلماسين
قاپي!
يوخلوغونون
سويوغونو دويورام
ايچه ري يه
گيررسم
دونارام
جهننمده.
4
يوخلوقلارين
آغير يوکونو
داشيماقدان
چيیينلريم
اَييليب .
بيلميرم،
بو نفس کسن
فهله ليیين اوجرتيني
هانسي اللر
اؤده يه جک!
5
مور
داغلاردان دومانلاري
اورکلردن
گومانلاري
يالانچيليق
ايمانلاري- ايناملاري؛
بير اوشاغين
چانتاسيندان
سيلگي سيني
چالا بيلسم
سيله جه یم...
6
ماهنيلارين
سود قوخويور
اللرين
سو.
اولمايامي
سن آنامسان؟!
يوخ...
آنام کي
ارکک دئييلدي
لچک لي
ايدي.
آنام اوزومه
گولردي
سن گؤزومو
گولدورورسن
آنام بويومو
اوخشاردي
سن روحومو
اوخشاييرسان
آنام مني
چوخ ايستردي
بيلميرم
سن...؟!
7
بير شئييم
دئييل کي گؤزل!
يالنيز،
بالاجانا درديم وار
"
گئجه " ...
چيراق
چکيلسن ايچيمه
سؤنر او
کابوسومدا
يوخسا
بير شئييم
دئييل کي...
8
بو گئجه
پنجره ني آچيق قوي نه اولار!
يامان
داريخيرام.
بلکه
بويلانديم گؤزلليیينه
تکليیيمين
آرخاسيندان.
بير ده
گؤزلريني
قاپاتما اولورسا
يامان
داريخيرام
بيلميرسنکي ...
9
بير
اويناقجيل دلي شاعير
پاييز ايله
آداخليدي
بوتون
ياغمورلو گونلرده
باشماقلاريندا توي توتار.
10
وارليغيمين
چرچيوه سي
دؤرد
ميسمارلا برکينيبدير؛
بيري
تانري
بيري
آنام
بيري
اومود
بيريسي
ده...
* * *
يوخلوغونون
اوچوروموندان آسيلميشام
سون ميسماريم!
قورتار
مني
بو اوچوشدان...
11
باخيشيني
مندن آلما ياز نفسليم!
قوي
باريشان
اولدوزوموزو
گؤزلرينده
پارلاق گؤروم.
آي تانينماز
اسکي تانيش!
اينان
سوسماقدان يورولموشام
گل،
مني بوستان قورخولاري
نين،
قارانليق
شهريندن آل
ناغيلداکي
ببکلرين يوردونا گؤتور.
گليشينه ته لس
آدديملارين
اوچون،
بير قوجاق
قيزيل گول نذيريم وار.
12
دلي- دلي
گولوب دئمه اوشاقسان!
بير
باخسانا
باشاريرام
سايماغي؛
بير...
ايکي...
سونرادان
اوچ...
"ايييرمي
ايکي" ياشيم وار
باشاريرام
سئومه یي.
باشاريرام
سني شعره قاتيب ايچم
گؤزلريندن
اَينيمه بير دونلوق بيچم
دوشلرينه
جيغير ساليب، اورادان کئچم .
باشاريرام
سني سندن آليب قاچام
اوره یيندن
اوره یيمه بير يول آچام
آي اولدوزلو
تونلرينه سئوينج ساچام.
باشاريرام
باخيشيندان باليق توتام
باشاريرام
گولوشوندن آلما درم
باشاريرام...
آنجاق،
بير آن سنسيز
ياشاماغي
باشارميرام...
باشارميرام...
باشارميرام.
13
سن آيريلدين
اوره یيمدن
اؤلکمدن
آيريلان
"قاراباغ"
کيمي ...
14
بوتون بزک
اشيالاريني
قوللوغا
آلدي.
( گؤزلليیيني
تاپماق اوچون)
* * *
آينا
قارشيسيندا
اؤزونو
ايتيرميشدي قادين.
15
آينا
قارشيسينا گئچرکن
ديشاريسي
ديرناق بويو
بؤجکدن بئله قورخان
قيزجيغاز.
ايچريسينه
بويلانديقدا
درينليیي
گئنيش- قارانليق
بوشلوق.
* * *
وارليغي نين
او تاييندا
موقدس اولاي
اوز وئرمکده
بوتؤو
وارليق يارانيشي
سئوگي
پاتلاييشي!
16
قاتار گئدير
من
دمير- دمير اوزاقلاشيرام سندن
ال ساللاييب گولومسه ييرسن آجيدان
دولومسونوب آغلاييرام ايچيم-ايچيم.
قاتار گئدير
ايچيمده بوشلوق يارانير شهر بويو
يوخلوغون بير بيچاق اولوب
کسير بوتون اومودومو ديليم-ديليم.
قاتار گئدير
گئتمه ميشدن دؤنورم من
سن ده گئديرسن دؤنمه دن
و ايتيرسن گؤزلريمدن ايليم-ايليم.
قاتار گئديب
من قالميشام
بير ده يولچوسوز دوراق
بير ده سن بيلميرم هارادا...
